A Xornada da Industria da X edición da Maker Faire Galicia será un punto de encontro único para explorar como a tecnoloxía, a ciencia e a creatividade están a transformar o noso presente e futuro. Este evento busca poñer en valor solucións innovadoras que abordan retos globais e que contribúen a repensar sectores estratéxicos como a saúde, a industria ou a cultura. Será tamén unha oportunidade para coñecer de preto a líderes globais que están na vangarda do cambio tecnolóxico e dixital.
Un dos grandes atractivos desta edición será a participación de Yaiza Rubio, un referente internacional no ámbito da ciberseguridade e a tecnoloxía avanzada, que participará na xornada aportando as súas visións e experiencias.
Actualmente, Yaiza é Chief Metaverso Officer en Telefónica, onde lidera proxectos tan innovadores como o de "Network Tokenization". No 2021, foi responsable do proxecto Smart WiFi, un referente na mellora da experiencia dixital do usuario. Destacou tamén como analista de ciberintelixencia en ElevenPaths, a unidade de ciberseguridade de Telefónica.
Unha traxectoria pioneira e recoñecida: Foi a primeira muller hacker española en participar nos prestixiosos eventos DEF CON e Black Hat Briefings e, ademais, recibiu a Cruz do Mérito con Distintivo Branco da Garda Civil polos seus logros no ámbito da ciberseguridade.
É autora de libros como "Bitcoin: La tecnología Blockchain y su investigación" e o "Manual de investigación en fuentes abiertas (OSINT)", e colabora como docente e divulgadora, conectando co público para trasladar conceptos complexos de maneira accesible.
A intervención de Yaiza será unha oportunidade única para explorar o impacto do metaverso, os desafíos da ciberseguridade e o futuro dixital que nos agarda.
