Na Xornada de Oficios da Maker Faire Galicia, poñemos o foco nos oficios que combinan tradición, innovación e sustentabilidade. Un dos exemplos máis destacados é o traballo de Fran Millán Valiño con Frouma Atlantic Wood, onde a madeira das bateas galegas, despois de décadas inmersa nas augas das rías, é recuperada e transformada en mobles únicos.
Esta madeira, impregnada pola forza e historia do mar, atopa unha nova vida grazas a un coidado proceso artesanal que realza a identidade e a tradición de Galicia. A charla de Fran, titulada Os mobles das bateas, amosará como este traballo artesanal busca honrar o mar e a cultura galega, ofrecendo mobles que, ademais de ser funcionais, incorporan a singularidade e autenticidade do Atlántico.
Fran Millán, despois de anos traballando para grandes empresas de ebanistaría a nivel internacional, decidiu volver ás súas raíces e crear un proxecto que non só reivindica o valor do traballo ben feito, senón que tamén mantén un compromiso ético co medio ambiente. Frouma Atlantic Wood non só crea mobles, senón que transforma materiais con pasado en deseños para o futuro, respectando a sustentabilidade e apostando polo comercio xusto.
Se queres descubrir a historia detrás destas pezas únicas e coñecer de preto a forza do mar plasmada en mobles, non perdas a intervención de Fran Millán Valiño na Xornada de Oficios da Maker Faire Galicia.
