Este ano, durante a Maker Faire Galicia, celébrase a cuarta edición do Game Maker Jam, un evento que foi mellorando ano tras ano no número de participantes e na calidade dos videoxogos presentados. Para quen non estea familiarizado co termo “Game Jam”, trátase dunha competición na que os participantes deberán crear prototipos de videoxogos de xeito libre e case improvisado, nun período de tempo determinado. O obxectivo é fomentar a experimentación e a innovación na industria dos videoxogos.
O tema central da Game Maker Jam deste ano desvelarase durante as xornadas profesionais, o 1 de xuño, e comunicarase a través das redes sociais ás 17:00 horas. A competición comezará a esa hora e rematará o 3 de xuño ás 18.00 horas. Un xurado formado por profesionais e académicos relacionados co sector do videoxogo valorará as novidades e os gañadores daranse a coñecer durante a entrega dos premios Maker Faire Galicia, o día 4 ás 19.00 horas. Os gañadores recibirán un trofeo oficial de GameMakerJam.
Este concurso busca fomentar a creatividade e o desenvolvemento dos videoxogos, ademais de servir de plataforma para coñecer xente e establecer relacións entre os participantes. A competición será totalmente en liña e poderá participar calquera persoa ou grupo sen restricións, pero unha mesma persoa só poderá formar parte dun equipo e os equipos poderán ser un máximo de 3 persoas.
Ademais, a Maker Faire Galicia contará este ano cun espazo dedicado en exclusiva á Game Jam, para aqueles desenvolvedores que desexen crear os seus videoxogos na propia feira e vivir unha experiencia incrible. Tamén haberá varios obradoiros relacionados co mundo dos videoxogos.
Se estás interesado en participar no concurso, podes atopar toda a información, incluídos os criterios de xuízo e os detalles do concurso, na canle ich.io: https://itch.io/jam/maker-faire-2023-gamejam
